بعد ما اتكلمنا عن إزاي تستلم شقتك .. دلوقتي هندخل في أول وأهم مرحلة وهي التأسيس للتشطيب .. ولما نقول تأسيس يعني الحاجات اللي هتتنفذ ويتقفل عليها وصعب تعديلها بعد ما تشطيب الشقة أو الفيلا يخلص ..
بنتكلم عن تأسيس السباكة و الكهربا والمحارة ..
دول أهم 3 بنود عندك وبيتبني عليهم كل البنود الجاية لحد ما تستلم شقتك على المفتاح ..
حضرتك محتار تبدأ بايه ؟! .. أحنا في شطبلي هنديلك كام معلومة هتفيدك
أولأ الأفضل تبتدي بتأسيس السباكة ..
ودا عشان تضمن وتعرف مستوى "الشيرب" بتاعك (يعني مستوى السيراميك ) واللي عليه بيتظبط ارتفاعات اي حاجة هتتنفذ بعد كدا من وشوش الكهربا والأحواض والنجارة وأي ديكور على الحوائط وكل ما هو مهم تعرف ارتفاعه عن مستوى فينيش السيراميك من البداية.
و"الشيرب" دا طبعا بيتحدد بناء على مستوى بيبة الصرف عشان مفيش مستوى في الشقة يكون أقل منها
ثانيا هتدخل في بند الكهربا ..
بس قبل ما تبتدي الكهربا العلب بتاع الوشوش هنحتاج نحدد ارتفاعها (ودا تم تحديده بناء على الشيرب) وكمان بروزها عن الحيطة وهنا لازم تجيب فني المحارة يعملك "بؤج" على الحيطة عشان يضمنلك مستوى المحارة بعد كدا فقط .. وبكدا تأسيس كهربتك يطلع مظبوط
ثالثا هيجي بند المحارة ..
وهنا حضرتك هتكون عندك البؤج معمولة ومستوى علب الكهربا مظبوط على وشها فتبدأ محارتك مرتاح جدا
في حال استلام الشقة على المحارة أصلا .. فانت هتلتلزم بمستوى المحارة اللي عندك (طبعا لو موزونة) وهتأسس الكهربا مباشرة
طبعا ممكن تدخل تأسيس الكهربا والسباكة مع بعض لو وقتك ضيق أو ما إلى ذلك بس أهم حاجة تاخد بالك من اللي قلناه والعمال شغالين ..
بالتوفيق للجميع .. وتحت أمركم في أي استفسار سواء على رسائل الصفحة أو الموقع أو تشرفونا باتصالاتكم 