أهلا بيكم في سلسلة "كلام في التشطيب" اللي هنتعرف فيها على شوية حاجات تهم أي حد بيشطب سواء مع شركة أو حتى بنفسه .. المرادي بنتكلم عن بند السباكة واللي بيحصل فيه وحاجات تهمك عشان تبقا فاهم اللي بيتنفذ ايه .. 

مبدئيا بند السباكة من أهم البنود اللي في شقتك أو فيلتك ودا عشان مثلا بيتحدد منه "شرب" الشقة يعني مستوى الفينيش اللي بيتبني عليه اي مقاس رأسي في الشقة (مثلا ارتفاع الصحي في الحمامات ووشوش الكهربا في الشقة ومستوى الأبواب والشبابيك وهكذا) 

طيب ايه مكونات بند السباكة :

أولا : شغل الصواعد :
ودا فيه مواسير الصاعد المغذية لأدوار الفيلا أو بتغذي شقتك وفيها مية وصرف ودي عادة بتكون معمولة جاهزة في حال استلام الشقة خصوصا لو نص تشطيب .. 
لكن في معظم حالات الفيلل بتكون انت ملزم بعملها ووقتها بنحدد صاعد لصرف القواعد 4 بوصة + صرف خفيف 2 بوصة + صاعد تهوية + ماسورة مصدر المية القابلة للاستخدام .. 

ثانيا : الشغل الخاص بتوزيع المياه (داخليا) :
وهنا بنتكلم على المية الصالحة للاستخدام والشرب اللي جاية من الصاعد لجوة وهنا بيركب المحبس في الدخول وبعدين بيتم توزيع المواسير ساقع وسخن (السخن عن طريق السخان) لكل مخارج الحمام والمطبخ من أحواض وشاور وخلافه ودي بتكون 3/4 بوصة ..
ودي بيتم استلامها من الفني من خلال الشركة المصنعة للمواسير زي BR مثلا عشان يدوك ضمان لمدة 10 سنوات ضد أي تسريب لأنه بيختبر ضغط المواسير وبيختبر حدوث أي تسريب ..

ثالثا : شغل الصرف (داخليا) :
وهنا الصرف بيكون صرف الحمامات كأحواض وشاور وهكذا .. وكمان فيه شبكة صرف التكييفات اللي بتتعمل داخليا للتكييفات وبتصرف على بيبة الحمام .. 
وهنا فيه أنواع منها اللي بيتركب في بعضة (عاشق ومعشوق) بدون لحامات ولزق ودا زي ماركة KESEL مثلا مش بيحتاج للزق ودا ممكن استخدامه أكتر في صروفات الحمامات والمطابخ .. أما اللي بيحتاج الغراء ولزق فهو شغل المواسير ال Smart مثلا وده عادة بنستخدمه لصروفات التكييفات .. 

أهم حاجة قبل أي شغل في السباكة أن يكون فيه تصميم هندسي دقيق لأماكن وتوزيع الصحي عشان بناء عليه بيتم عمل مخارج المياه والصرف .. ومن غير تصميم وتخيل مقاسات الصحي اللي هتركب بعد السيراميك بتحصل مشاكل كتير جدا من ضيق الحمامات وعدم تناسب الصحي كمسافات وابعاد مع بعضه ومع مساحة الحمام .. فنصيحة ليك بلاش تشتغل بدون تصميم ويفضل استلام البند من خلال مهندس متخصص لاستلام التفاصيل اللي ممكن صعب تعرفها (زي ارتفاعات الصحي ومخارجه والشيرب المناسب ومستوى البيبة مع الشقة وهكذا )..

بالتوفيق للجميع .. وتحت أمركم في أي استفسار سواء على رسائل الصفحة أو الموقع أو تشرفونا باتصالاتكم