ألف مبروك أخيرا حلم عمرك في امتلاك شقة بيتحقق .. بس استنى بس مش عايزين الفرحة تنسيك ازاي تقيم وضع شقتك وازاي تستلمها ..
مبدئيا كدا لما بتيجي تشتري شقة هيكون اختيارك واحد من الاتي :
: أولا : شقة في عمارة حرة مش في كمبوند
وهنا هتشتريها من حد باني عمارة من خلال مقاول وفي اغلب الاحيان بيكون مستوى بناها وتشطيبها (لو نص تشطيب) بيكون رديء ويفضل في الحالة دي تدور على شقة على الطوب الاحمر مش على المحارة ومهم جدا يكون البنا نفسه الى حد كبير معدول مش مايل ميول كبيرة ويكون موزون عشان تضمن لما تيجي تعمل محارة متربيش محارة في الجوانب كتير
وطبعا لو معمول شغل كهربا ومشدود فيه شدادات وخراطيم واصلة للوحة أو مكانها على الأقل فدا كدا شغل محترم وغالبا هتحتاج تعدل عليه بشكل بسيط حسب الفرش ومكانه لكن مش معمول كدا يبقا اي كلام ومش هتعرف تعتمد عليه وهتعيده من اول وجديد
: ثانيا: شقة في كمبوند
عادة بتكون نص تشطيب ومعظم الاوقات بيكون استلام شركة واشراف استشاري يعني فرصة تكون المحارة كويسة اعلى وهنا لازم تستلم محارتك كويس وتطمن انها مش مطبلة وتكون موزونة كويس وكمان شغل الكهربا (كنص تشطيب) معمول بشكل كويس ومسحوب فيه شدادات عشان سحب السلك زي ما قلنا
تعالى بقا وخد نصايح شطبلي ليك
في الحالتين لو تقدر تستلم شقتك على الطوب الاحمر وتاخد فرق المحارة وتعملها انت افضل بكتير جدا وأوفر قدام لان دا اهم بند عشان هيتبني عليه كل اللي جي
لما تروح تستلم عشان تتعاقد يفضل ان يكون معاك مهندس تشطيبات او حد بيفهم كويس في البنود دي عشان هيبينلك عيوبها ومميزاتها فيبقا معاك حق تقلل في تمنها او تبقا مقدر هتتكلف زيادة كام قدام
لو ليك تعديلات على المساحات او الحوائط يبقا حضرتك ما تستلمش استلام نهائي إلا لما المطلوب يخلص وحد يستلمهولك لو مش هتعرف
وأخيرا نتمنى نكون افدناك ومبروك مرة تانية وتحت امرك في اي استفسار 😉